अमरनाथ गुफा मंदिर भारत के जम्मू अउरी कश्मीर में हिंदू लोग खातिर पबित्र धाम हवे। अहिजा एगो गुफा में प्राकृतिक रूप से बरफ के शिवलिंग के निर्माण होला। हर साल इहाँ हिंदू तीर्थ यात्री लोग भारी संख्या में आवे ला जेकरा अमरनाथ यात्रा कहल जाला। जवना गुफा में ई मंदिर बा ऊ समुंद्र तल से लगभग 3,888 मीटर के ऊँचाई पर, श्रीनगर से करीबन 141 किलोमीटर के दूरी पर बा, जहाँ पहलगाम कस्बा से हो के जाइल जाला। हिंदू धर्म माने वाला लोग खातिर एह तीर्थ के बहुत महत्व हवे। गुफा के आसपास बरफ से तोपाइल पहाड़ बाने। गुफा खुदे साल के ज्यादातर समय बरफ से तोपाइल रहे ले, कुछ दिन खातिर गरमी के सीजन में तीर्थ यात्री लोग खातिर खुले ले।
