राष्ट्रपति भवन भारत के राजधानी दिल्ली में भारत के राष्ट्रपति के निवास बाटे। राष्ट्रपति भवन नाँव के प्रयोग ख़ाली बिल्डिंग खातिर भी होला जवना में दफ्तर, आवास आ गेस्ट रूम बाड़ें, आ ई नाँव पुरा आवासीय परिसर खातिर भी इस्तेमाल होला जवना में आसपास के बाग़ आ ख़ाली जगह भी गिन लिहल जाला। ई पुरा परिसर कौनों राष्ट्राध्यक्ष के आवास के रूप में दुनिया के सभसे बड़ा परिसर रहे जबले कि तुर्की के राष्ट्रपति के आवास 29 अक्टूबर 2014 के ना खुल गइल। पहिले एकरा के वायसरॉय हाउस कहल जाय।